Waziri Nchemba awataka polisi kuendelea kukabiliana na uhalifu

Na Godfriend Mbuya

Waziri wa Mambo ya Ndani ya Nchi Mwigulu Lameck Nchemba amelitaka jeshi la polisi kanda ya ziwa kuendelea kupambana na matukio ya kihalifu ambayo yameshamiri katika maeneo yao.

Waziri Nchemba ameyasema hayo Jijini Mwanza baada ya kupokea taarifa na kusikiliza kero mbalimbali za wafanyakazi walio katika wizara yake pamoja na kupokea taarifa juu ya ulinzi na usalama kutoka kwa Kamanda wa Polisi Mwanza Ahmed Msangi.

“Endeleeni kupambana na matukio yote ya uhalifu, matukio ya uvuvi haramu, mauaji ya albino na vikongwe pamoja na matukio ya ujambazi ili kuhakikisha maeneo yenu yanakuwa salama katika kazi mbalimbali halali za watu” Amesema Waziri Nchemba.

Aidha Waziri Nchemba ametembelea makazi ya askari polisi katika eneo la Mabatini pamoja na Igogo na kuona hali halisi ya uchakavu na ubovu wa makazi hayo na kulitaka jeshi la polisi kwa kazi ambazo zipo chini ya uwezo wao kutumia nguvu kazi iliyochini yao.

Pamoja na hayo Waziri Nchemba amelitaka Shirika la Umeme nchini TANESCO kutowakatia umeme taasisi zilizochini yake badala yake madeni yote yapelekwe makao makuu ya TANESCO na baada ya hapo yawasilishwe Wizara ya Fedha ili malipo yaweze kufanyika kwa wakati.