DC awafunda wajasiriamali

MKUU wa Wilaya (DC) ya Mwanza, Amina Masenza amewataka wajasiriamali 10 wa Kanda ya Ziwa waliopatiwa vitendea kazi katika programu ya Safari Wezeshwa kuvitumia vema, ili viweze kuwaendeleza kiuchumi.

Akizungumza na wajasiriamali hao na wakazi wa jiji la Mwanza waliojitokeza kushuhudia tukio hilo juzi katika Uwanja wa Furahisha, Masenza alisema ni wakati muafaka kwa wajasiriamali hao kuinua maisha yao na jamii inayowazunguka.

“Kaweni mfano na mabalozi katika jamii kupitia ruzuku hizi, waonyesheni TBL kuwa kuanzisha programu hii hawajakosea bali ni ubunifu wa hali ya juu ambao utaleta tija na baada ya muda jamii itatambua mchango wao kupitia haya wanayoyafanya sasa,” alisema mkuu huyo wa wilaya.

Pamoja na hayo, aliwataka waliokosa nafasi ya kupewa ruzuku wasikate tamaa, na kwamba wajaribu awamu ijayo na kwa wale ambao hawajawahi kuomba  wafanye hivyo.

Meneja wa bia ya Safari Lager, Oscar Shelukindo, aliwataka wajasiriamali kuitumia vema semina waliyopewa ya namna ya kuendesha biashara zao huku akiwahimiza kutumia vema ruzuku hizo.

Shelukindo alisema yuko tayari kumsaidia mjasiriamali aliyepiga hatua kwa kumuongezea kitu alichokwama ili apige hatua zaidi ya maendeleo.

Programu ya Safari Lager Wezeshwa ya Kampuni ya Bia Tanzania (TBL) ilianza mwaka juzi na hii ni mara ya pili kutoa ruzuku kwa wajasiriamali.

CHANZO : TANZANIA DAIMA