WATAKA SHERIA KULINDA VYOMBO VYA HABARI

na Jovither Kaijage, Ukerewe

BARAZA la Vijana la Wilaya ya  ya Ukerewe, jijini Mwanza, limependekeza kuwepo kipengele cha sheria  katika Katiba mpya  ijayo   cha  kulinda   vyombo vya habari  ili kuviwezesha  kutekeleza majukumu yake vema pasipo kuingiliwa na hata kufungiwa  kama ilivyo sasa.

Pendekezo hilo limetolewa jana  katika mdahalo wa siku moja ulioandaliwa na baraza hilo kwa ufadhili wa shilika la Forum Syd  kupitia  na kuchambua vifungu vya  Katiba ya sasa kubaini  sheria nzuri zinazotakiwa kubaki katika katiba  ijayo.

Wakitoa maoni yao baadhi ya  vijana walisema,  baadhi ya sheria zilizopo katika katiba ya sasa ikiwemo sheria ya  magazeti ya  mwaka 1976, ni kikwazo kwa  jamii ya Watanzania kupata habari  zilizo sahii na kwa wakati.

Mmoja wa vijana hao, Msekwa  Bita,  alisema  sheria hiyo inatumiwa kukandamiza  vyombo vya habari  na kuongeza kuwa, hivi karibuni  sheria hiyo imetumika kulifungia gazeti la Mwanahalisi  kwa madai  ya uchochezi.

Katika maelezo yake zaidi ambayo yaliungwa mkono na washiliki wengi, alisema  sheria hiyo mbali ya kutumika kuvifunga mdomo vyombo vya habari, pia  ipo kinyume cha Katiba  ambayo inataka  kuwepo uhuru wa kutoa maoni  na kupata  habari.

Wakichangia  maoni zaidi, pia  vijana hao wametaka pia iwepo sheria ya kuwalinda  wahandishi wa habari  ambao mbali ya kujeruiwa na hata kuuawa, pia  wanapewa vitisho, hali  ambayo inayowafanya washindwe kutekeleza  wajibu wao ipasavyo.

Naye mwezeshaji wa jamii na mlezi  wa baraza hilo , Raphael  Kulola mbali ya kuunga mkono maoni hayo, pia ametaka  iwepo sheria  ya kuwabana baadhi ya viongozi  wanaokwepa kutoa  habari  pindi wanapotakiwa  kufanya hivyo.

Katika hatua nyingine,   vijana hao wametaka  madaraka ya Rais  yapunguzwe ikiwa ni pamoja na  mawaziri  wasitokane na wabunge ili kukiwezesha chombo hicho kutimiza  wajibu wake vema wa kuisimamia serikali.

Akitoa  maoni yake juu ya suala hilo, Catheline Athanas  alisema  ni vema  nafasi za  uwaziri zikaombwa  kama kazi nyingine na kwa kufuata taaluma ili  kupata viongozi  wanaweza kuwajibika  vema na  kuleta maendeleo  ya haraka.

Alisema, mfumo  uliopo sasa wa kuwapata viongozi hao na  wasekta nyingine  mbali ya kumpa madaraka makubwa  rais pia  unaweza kusababisha kuteuliwa viongozi wasio na uwezo  pamoja  na  nafasi hizo kutolewa kwa upendeleo.

Mwezeshaji wa jamii, Raphael  Kulola ,  akizungumza katika mdahalo huo uliofadhiliwa na Shirika la Forum  Syd, amewataka vijana kujitokeza  kwa wingi kutoa maoni yao kwa tume ya kukusanya  maoni  ya Katiba mpya ikiwa ndiyo njia  pekee ya  kupata katiba  yenye masilahi ya wengi.

Chanzo: Tanzania Daima