WATAKA UTARATIBU WA KUKIMBIZA MWENGE USITISHWE

na Jovither Kaijage, Ukerewe

BAADHI ya  wakazi wa Wilaya ya  Ukerewe, Mwanza  wameishauri serikali  kuachana na utaratibu wa  kukimbiza  Mwenge wa Uhuru kila  mwaka ili kuepusha gharama  zisizo za lazima kwa  taifa.

Walitoa ushauri huo jana kwa nyakati tofauti wakati Mwenge huo wa Uhuru ulipopokewa na uongozi wa Mkoa wa Mwanza  na kuanza kukimbizwa  katika wilaya saba za mkoa huo.

Ainex   Kagambirwe,  alisema  inasikitisha  kuona fedha nyingi zinaendelea  kutumika  kugharamia  utaratibu huo kila mwaka  wakati  Watanzania wengi wanakosa  huduma muhimu kama  matibabu na  elimu bora.

Akieleza zaidi alisema  fedha na rasilimali zinazogharamia  mbio za Mwenge huo kila mwaka  ni vema  zikatumika kuboresha  huduma za jamii ikiwamo  ununuzi wa madawati na vifaa vingine  shuleni, dawa na vifaa tiba  katika vituo vya afya na hospitalini.

Naye Mwalimu  ambaye hakutaka jina lake litajwe mbali na kuunga mkono wazo hilo  pia alishauri  kuandaliwa utaratibu mwingine wa  kukimbiza Mwenge kwa kupendekeza  kiwepo kipindi  maalumu cha kufanya  zoezi hilo tofauti na  sasa ambapo  unakimbizwa kila mwaka  na kuligharimu taifa  fedha nyingi.

Alisema  kama  utawekwa muda maalumu wa  kutekeza  shughuli hiyo itasaidia  kutengwa bajeti ya fedha za shughuli hiyo na kuondoa tatizo la muda mrefu la kutegemea michango ya kujitolea ambayo imegeuka  kuwa kero kwa wananchi.

Chanzo: Tanzania Daima