Viongozi wa kijiji wafungwa miaka 21

na Jovither Kaijage, Ukerewe

WATU sita wakiwemo viongozi  watatu wa serikali ya Kijiji  na Kisiwa  kidogo cha Sizu, Kata ya Kagunguri, Wilaya ya Ukerewe, mkoani Mwanza, wamehukumiwa kutumikia kifungo cha  miaka  21 gerezani kila  mmoja  baada ya  mahakama kuwatia hatiani kwa makosa  mawili ya kujeruhi na kuiba mali.

Vingozi hao  ni Ofisa Mtendaji wa Kijiji cha Sizu, Richard Msanyika (47), Mwenyekiti wa kijiji hicho, Balikoba Bihemo (46) na mwenyekiti wa kitongoji cha  Ilundu  A na Deus  Isaya Nyamwelo (32).

Wengine ni Samson  Maningi (21), Mkama Mahendeka (25) na Alex  Edimund (42) wote wakazi wa  kisiwa hicho cha Sizu.

Hakimu Mkazi Mfawidhi wa Mahakama ya Wilaya ya Ukerewe, Reuben  Luhasha,  alitoa hukumu hiyo baada ya kuridhika pasipo  shaka na ushahidi wa upande wa   mashitaka  kuwa  watu hao walitenda  makosa  hayo.

Katika shitaka  hilo ilidaiwa na mwendesha  mashitaka wa Polisi,  Inspekta  Samwel  Onyango,  kuwa  washitakiwa hao ambao kila mmoja alikabiliwa na makosa  saba walitenda  makosa hayo Mei 21 mwaka 2008  majira  ya saa 1:00 asubui katika Kisiwa cha Sizu.

Aliendelea kuieleza mahakama  hiyo kuwa  washitakiwa hao kwa pamoja waliwashambulia na kuwajeruhi  maofisa sita wa serikali waliokuwa  katika  shughuli ya kuzuia  uvuvi haramu na kisha  walichoma  moto  mtumbwi wao wenye  injini  na  kusababisha  hasara ya  sh 3,930,000.

Aliwataja maofisa hao kuwa ni askari Polisi No. F. 8488 PC Hamza, Ofisa Mtendaji wa Kata ya Murutunguru, Frotunatus Mtesigwa  na Ofisa Mtendaji wa Kijiji cha Busagami, John Surus.

Wengine  ni Ofisa Mtendaji wa Kijiji  cha Kameya, Steven Sindika, Ofisa Mtendaji wa Kijiji cha Bugorola, Pius  Mkama na Mwenyekiti wa  kikundi cha kuhifadhi mazingira  ya Ziwa Victoria (BMU’s) kituo cha Bugorola, Pascal Thomas.

Chanzo: Tanzania Daima