RAIS CHUO KIKUU BUGANDO AOKOTWA AKIWA HOI MWANZA

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

 

Rais wa Serikali ya Wanafunzi Chuo Kikuu cha Sayansi ya Afya na Tiba Bugando (Cuhas), Mussa Mdede ambaye alitoweka katika mazingira ya kutatanisha Juni 17, mwaka huu ameokotwa eneo la Busagara mkoani hapa akiwa hajitambui.

Kamanda wa Polisi Mkoa wa Mwanza, Valentino Mlowola alisema jana kwamba baada ya kupatikana alipelekwa katika Hospitali ya Rufaa Bugando na kufanyiwa uchunguzi na jana aliruhusiwa kwenda nyumbani.

Mdede ambaye pia ni Mwenyekiti wa Jumuiya ya Wanafunzi wa Taasisi za Elimu ya Juu Tanzania (Tahliso), alitoweka Juni 17 muda mfupi kabla ya kurudisha fomu za kuomba kutetea nafasi yake ya urais katika uchaguzi wa viongozi wa Serikali hiyo ambao ulipangwa kufanyika Juni 29, chuoni hapo.

Imedaiwa kwamba alitekwa nyara kutokana na ushawishi mkubwa wa kisiasa alionao chuoni hapo sambamba na kupingwa na baadhi ya watu kutokana na msimamo wake wa kutetea wanafunzi wa elimu ya juu nchini.

Tukio hilo lilisababisha viongozi wa Cuhas kusitisha shughuli zote za uchaguzi ambazo zilikuwa zinafanyika chuoni hapo hadi rais huyo atakaporejea.

Makamu wa Rais wa Cuhas, Atukuzwe Mordecai alisema Mdede alipatikana jana saa sita mchana baada ya kuokotwa na watu wawili ambao ni wafanyabiashara eneo la Busagara, huku akiwa hajitambui.

“Tulipata taarifa jana (juzi) jioni kutoka kwa mama mwenye nyumba anapoishi. Hadi sasa bado hana kumbukumbu vizuri na kwamba hatambui kitu gani kilitokea, lakini kiafya yupo salama.”

Waziri Mkuu wa Cuhas, Thomas Benjamini alishukuru wasamaria wema waliomsaidia Mdede.

Hata hivyo, taarifa kutoka kwa baadhi ya watu wa karibu na mwanafunzi huyo zinadai kwamba Mdede amekuwa akitishiwa na baadhi ya watu na kumtaka atoe tamko kuhusu mchakato wa Katiba Mpya akiwa Mwenyekiti wa Tahliso.

Pia, taarifa hizo zinadai kuwa alishawahi kutengewa kiasi cha Sh20 milioni na watu ambao walimtaka aache kuwa na misimamo na kwamba awe upande wao kitu ambacho alikipinga na kukataa fedha hizo.
Chanzo:Mwananchi