WATUMISHI 4 WA AFYA WASIMAMISHWA KAZI.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.

 

 HALMASHAURI ya Wilaya ya Ukerewe Mwanza, imewasimamisha kazi watumishi wanne wa idara ya afya kwa tuhuma za kughushi vyeti.

 

Waliosimamishwa ni Angel Luhumbika, Monica Lameck, Joyce Mpembwe na Regina Maguta. Uamuzi huo ulitangazwa jana katika kikao cha Baraza la Madiwani.

Watumishi hao waliajiriwa mwaka juzi wakiwa wataalamu wasaidizi wa maabara katika hospitali ya wilaya hiyo.
Mwenyekiti wa Halmashauri ya Wilaya ya Ukerewe, George Machela ndiye alitoa taarifa hiyo kwa madiwani.

Ofisa Utumishi wa halmashauri ya wilaya hiyo, Pelagia Sogoti alisema baada ya ofisi yake kupokea malalamiko hayo, ilichukua hatua ya kuwasimamisha kazi haraka na kuanzisha uchunguzi kuthibitisha tuhuma zinazowakabili.
Alisema uchunguzi huo ulihusisha vyuo ambavyo vyeti vyao vilionesha wamesoma na kuhitimu mafunzo yao.

Mkurugenzi mtendaji wa halmashauri ya wilaya ya Ukerewe, Jumanne Mwasamila alisema mtumishi anayethibitika kughushi vyeti na nyaraka nyingine za ajira, adhabu yake ni kufukuzwa kazi na kushitakiwa mahakamani kwa hatua zaidi za kisheria.

Akifafanua alisema watumishi hao walitiliwa shaka na kutolewa taarifa katika ofisi yake na uongozi wa hospitali ya wilaya, baada ya kushindwa kumudu shughuli yao ya kupima sampuli za wagonjwa.
CHANZO: HABARI LEO.